Ingvar Valgeirsson

25.9.2007 | 18:26

Hvað heitir gatið framan á gítar?

Fyrirsögnin hér að ofan er einnig fyrirsögn blaðagreinar á bls. 15 í Morgunblaðinu í gær, 24. september. Þar er verið að fjalla um nýja orðabók, sem ber heitið Stóra myndorðabókin.

Sá sem á veg og vanda af útgáfu bókarinnar segir m.a. í greininni: "Einhver gæti t.d. velt því fyrir sér hvað gatið framan á gítar heitir. Ef þú veist það ekki geturðu ekki flett þýðingunni upp í hefðbundinni orðabók. Í myndorðabókinni flettirðu einfaldlega upp á kaflanum um tónlist og finnur gítar og sérð þar hvað allir hlutar hans heita."

Greininni fylgir svo mynd af gítar, tekin úr umræddri bók. Er ég leit á myndina hló ég dátt. Þar stendur nefnilega hvergi hvað gatið sjálft heitir. Hinsvegar er bent á skreytinguna kringum gatið og sagt að það heiti rós. Ég hef reyndar aldrei heyrt það kallað annað en rósettu.

Hvergi á myndinni er tekið fram að gatið er kallað hljómop, eða soundhole á ensku. Stórefast um að útgefandinn viti það ennþá.

Flokkur: Bloggar | Facebook