Bjarni vann!

Stórvinur minn og minn persónulegi Guðfræðingur, Bjarni Randver, vann veðskuldaðan sigur í leikaragetrauninni. Spurt var um Terence Hill, sem réttu nafni heitir Mario Girotti. Hálf-germanskur og hálfur ítali, bjó í nágrenni Dresden meðan seinna stríð geysaði og lifði af hinar frægu loftárásir á þá ágætu borg í lok stríðs, þá ekki byrjaður í grunnskóla.

Hann byrjaði að leika í bíó í ítölskum myndum áður en hann varð tólf vetra og hefur verið að síðan. Landsmenn kannast eflaust best við hann sem mjóa kallinn í hinum alslæmu Trinity-myndum, hvar hann lék á móti Bud Spencer. Þær myndir gengu í bíó í denn og voru vinsælar í árdaga vídeóleiganna hérlendis.

Terence Hill er núna kominn fast að sjötugu og leikur enn. Hann leikur nú aðalhlutverkið í ítölskum spennuþáttum sem hafa gengið í fast að áratug.

Hér er hann í sinni langbestu mynd, My Name is Nobody:

Athugasemdir

[Brynhildur (IP-tala skráð) 14.11.2008 kl. 11:56]

Ingvarinn minn það er nú einu sinni þannig með þessar djétraunir þínar að ef Bjarni og Jósi myndu ekki svara þessu fyrir okkur hin (sem ekkert vitum greinilega) þá kæmi aldrei svar neinni djétraun og þetta yrði allt mjög langdregið og leiðigjarnt.

Því fagna ég Bjarna og einnig Jósa fyrir að auka á ónauðsynlega vitneskju okkar hinna og svara med det samme ;)

Hér kemur hins vegar ein djétraun fyrir þig: Hver lék bílstjórann sem átti "froskinn" í Jóni Oddi og Jóni Bjarna?

kv, bóndatjéllingin.

[Pétur (IP-tala skráð) 14.11.2008 kl. 14:09]

Alslæmu Trinity myndum...heyrðu nú minn!!! Hvurslags?

[Magnús Geir Guðmundsson, 14.11.2008 kl. 14:29]

Sammála Pétri, bannað að vera með alslæmar eitthvað..! HIns vegar er nú erfitt að bera á móti því, að My Name Is Nobody sé hans besta kúrekamynd allavega eða "Vestramynd", hún átti nú sinn þátt í því að ég fór að pæla meir í slíkum myndum frá fyrri tíð, sem skóp svo ást á Clintaranum þarna frá Austurviði og fleiri hetjum. En My Name.. er þó ekki hvað síst mér minnistæð fyrir litla tónstykkið eftir Ennio Morricone, eitt af hans óteljandi meistaraverkum í öllum sínum einfaldleika, sem ég raula enn fyrir munni mér annars lagið!

EF mig misminnir svo ekki, þá er Terence með djúpblá augu. EFtir einhverja myndina með honum heyrði ég unga stelpu segja að hann væri með "sjúkleg" augu!

[Brynhildur (IP-tala skráð) 14.11.2008 kl. 15:45]

Það er alveg rétt þetta er ansi hreint huggulegur maður með sérstaklega heillandi augnarráð .......það vantar ekkert upp á það :)

[Bjarni (IP-tala skráð) 14.11.2008 kl. 17:15]

Bestu myndirnar með Mario Girotti sem ég hef séð eru spaghettí-vestrarnir Viva Django! (Ferdinando Baldi: 1968) og God Forgives, I Don't (Giuseppe Colizzi: 1967), marxíska ádeiludramað La grande strada azzurra (Gillo Pontecorvo: 1957) og meistaraverkið Il gattopardo (Luchino Visconti: 1963), að sjálfsögðu allt ítalskar kvikmyndir. Spaghettí-vestrinn My Name is Nobody (Tonino Vallerii: 1973) er mistækur en með nokkra góða spretti, ekki síst í þeim atriðum sem framleiðandinn Sergio Leone sá sjálfur um að leikstýra. Næsti spaghettí-vestri sem Leone framleiddi með Girotti í aðalhlutverki, A Genius, Two Partners and a Dupe (Damiano Damiani: 1975) er allsíðri. Þá má einnig nefna spaghettí-vestrana Ace High (Giuseppe Colizzi: 1968), Boot Hill (Giuseppe Colizzi: 1969) og Revenge of Trinity (Mario Camus: 1970) sem eru miðlungsmyndir. Flestar aðrar myndir sem ég hef séð með Girotti hefur mér hins vegar fundist frekar lélegar eða jafnvel nær alvondar. Engu að síður má svo sem hafa gaman af sumum þeirra, t.d. njósnamyndinni Schüsse im Dreivierteltakt (Alfred Weidenmann: 1965) sem skartar tónlist í flutningi Gerts Wildens og hljómsveitar hans. Hefur þú ekki séð flestar af þessum myndum Ingvar?

[Ingvar Valgeirsson, 14.11.2008 kl. 18:11]

Ég hef vissulega séð My Name is Nobody og það oftar en einu sinni. Svo fórum við saman í bíó og sáum nokkrar Trinity í denn, minnir að God forgives, I don´t og Revenge of Trinity hafi verið þar á meðal. Svo rámar mig í Ace High.

Svo man ég eftir að ég sá Djangó-myndina hjá Hansa einhverntíma þegar ég var líklega ca. tólf ára. Fannst hún ÆÐI! Held mér þætti hún ekki jafngóð í dag.

Finnst líklegt að Nobody vinni.

[arnar valgeirsson, 14.11.2008 kl. 22:17]

vissedda allan tímann. vildi bara leyfa bjarna að reyna sig.

ú jebbs