Ingvar Valgeirsson

13.3.2009 | 13:43

Sveppur Bergmann

Við Sveppur, þ.e.a.s. Miðju-Sveppur, höfum ákaflega gaman af þættinum hans Loga Bergmann. Sérstaklega fannst mér skemmtilegur síðasti þáttur, hvar leikaraparið Jói og Gói fóru á kostum.

Sveppur á það til að grípa á lofti alla þá frasa sem hann á helst ekki að grípa og festa þá á harða disknum og það átti líka við sl. föstudag. Logi hrósaði gestum sínum fyrir almennan hressleika og þeir hrósuðu honum einnig og sögðu að hann væri ekki síður hress. Logi svaraði "það er af því ég er alltaf aðeins íðí". Sveppur spurði hvað það þýddi að vera íðí og ég útskýrði það. Sagði honum líka að Logi væri bara að grínast, hann væri varla skjóðumildur í sjónvarpinu.

Svo gleymdist þetta þangað til í morgun. Ég henti Sveppi á leikskólann áður en ég hélt til vinnu og þar var vel tekið á móti honum að venju. Ein fóstran sagði að það væri svo gaman að sjá hann af því að hann væri alltaf svo hress.

Þarf ég að taka fram hverju hann svaraði?

Flokkur: Bloggar | Facebook