Ingvar Valgeirsson

16.9.2009 | 09:55

Fangelsisröfl

Nú sé ég á forsíðu Fréttablaðsins að fangelsin hérlendis eru víst yfirfull. Það er agalegt, því ekki viljum við skemma það orðspor sem fer af fangelsum hérlendis, en erlendur afbrotamaður líkti þeim við fimm stjörnu hótel í sjónvarpsviðtali nýverið.

Hérlend fangelsi eru svo ljómandi fín að glæpamenn koma erlendis frá gagngert til að frekja hér glæpi, vitandi það að það skiptir litlu máli þótt þeir verði gripnir, fangelsisvistin á víst að vera svo ljómandi. Fangelsin virðast vera svo frábær að menn fara þangað aftur og aftur, þ.e.a.s. ef þeir komast einhverntíma í afplánun. Menn eru jafnvel búnir að bíða árum saman eftir að komast inn, búnir að fara í meðferð, stofna fjölskyldu, komnir í vinnu og orðnir nýtir þjóðfélagsþegnar þegar þeir loksins fara bak við lás og slá. Enda ekki gott að vera að flýta sér um of.

En lausnin er fyrir mér alveg augljós - nú eru frændur okkar Bandaríkjamenn að loka Guantanamo-fangelsinu. Það væri illa farið með gott húsnæði að láta það standa autt og því tilvalið að reyna að fá plássið fyrir lítið. Byrja á að senda þangað þá erlendu afbrotamenn sem hingað hafa komið eingöngu til að stunda iðju sína, ásamt ofbeldismönnum og níðingum af ýmsum toga.

Staðurinn er jú með reynslu og það besta virðist vera að þeir sem eitt sinn fara þangað langar ekkert þangað aftur, öfugt við hérlend fangelsi.

Flokkur: Bloggar | Facebook