Skemmtileg sumarvinna

Hef sagt frá þessu áður, en sjaldan er góð ýsa of oft freðin...

Í fyrra, að mig minnir um hásumarið, var ég að spila einu sinni sem oftar á hinum rómantíska skemmtistað Dubliner. Eins og margir vita er staðurinn vinsæll meðal ferðamanna og þetta tiltekna kvöld voru þeir í miklum meirihluta. Meðan ég var í veðskuldaðri pásu kom breskur maður, líklega um tvítugt, og gaf sig á tal við mig. Hann sagði mér að hann hefði verið að koma af einhverri mótmælasamkundunni uppi á heiðum ásamt tveimur vinum sínum á svipuðum aldri, manni og konu. Mér fannst skrýtið, og finnst enn, að útlendingar, sem aldrei höfðu komið hingað áður og vissu lítið um landið og ekkert um hálendið eða virkjanamál, skyldu eyða sumarfríinu í að hanga uppi á fjöllum. Þá sagði hann mér gersamlega án þess að skammast sín að þau hefðu fengið borgað fyrir viðvikið, bæði flugmiðana á skerið og peninga.

Ekkert þeirra sá neitt athugavert við fyrirkomulagið og litu meira á þetta sem ævintýri eða skemmtilega sumarvinnu. Ég trúði þessu varla fyrst og hélt að þau væru að grínast í mér, en þegar maðurinn brá sér frá staðfesti félagi hans söguna og hans frásögn stemmdi alveg, þó svo hann væri ekki alveg jafnmálglaður og yfirlýsingaglaður og sá fyrri. Ýjaði (er ekki örugglega ypsilon í ýjaði?) reyndar að því að hann kynni vel að meta ef ég hefði ekki of hátt um þetta, en eins og sjá má á greininni gaf ég ekkert loforð um það...

"Saving Iceland" krefur RÚV um sannanir

Athugasemdir

[Guðríður Pétursdóttir, 29.7.2007 kl. 17:43]

..... ég fæ hálfgerðan kjánahroll svo asnalegt finnst mér þetta vera

[Ingvar Valgeirsson, 29.7.2007 kl. 22:09]

Hvað? Að ég sé ekki viss um hvernig á að skrifa "ýjaði"?

:)

[Guðríður Pétursdóttir, 29.7.2007 kl. 23:17]

ja það sér hver maður að ekki er það íjaði..... eða hvað...

[Maron Bergmann Jónasson, 29.7.2007 kl. 23:17]

Mesta snilldin við þetta er sú að sumir af þessum útlensku "atvinnumótmælendum" eru í raun og veru krakkar sem eiga moldríka foreldra og líta á það sem skemmtilegt hobbý að ferðast um heiminn og mótmæla hinu og þessu sem þau hafa ekkert vit á.  Svo þegar fríið er búið mæta þau svo aftur í fokdýru einkaskólana sem foreldrarnir borga að sjálfsögðu og geta sagt skemmtilegar sögur af "ævintýrum" sumarsins. 

Ég kynntist einmitt svona fólki þegar ég var að vinna á hinum merkilega stað sem er staðsettur að Hafnarstræti 4.

Ýjaði lítur allavegana betur út skrifað með ý.

[Ingvar Valgeirsson, 29.7.2007 kl. 23:29]

Góð mynd af þér, frændi!

[Maron Bergmann Jónasson, 30.7.2007 kl. 00:23]

Þú getur ekki ímyndað þér fordómana sem ég verð fyrir bara af því ég virðist vera með tvö horn á myndinni.

[Brynhildur (IP-tala skráð) 30.7.2007 kl. 08:31]

Afs....en hver í andsk... borgar fyrir svona lagað? Ég þarf sannanir.

[Ingvar Valgeirsson, 30.7.2007 kl. 14:18]

Já, spurningin er svolítið hver borgi fyrir svona. Íslenskir fréttamenn voru eitt sinn staddir við Greenpeace-mótmæli við sjávarréttastaðinn Long John Silver í Ameríku. Þar spurðu þeir nokkra mótmælendur út í skoðanir þeirra á hvalveiðum og þessháttar, en mótmælendurnir gátu litlu svarað. Kom í ljós við frekari spurningar að þeir höfðu fengið borgað fyrir að standa þarna með skilti og vera með almenn leiðindi.

Fyrir nokkrum árum leigði ég hljóðkerfið mitt á samkundur (minnir að þær hafi verið tvær) hjá fólki sem mótmælti virkjun á Eyjabökkum. Fékk ágætlega borgað fyrir, ef ég man rétt, auk þess að veitingar voru ekki skornar við nögl og borið á borð bæði vott og þurrt í talsverðu magni. Eitthvað var einnig um aðkeypt skemmtiatriði að ég held. Ber að taka fram að samkomurnar, undir stjórn eins ástsælasta hljómborðsleikara landsins, fóru á allan máta vel fram og málefnalega og áttu lítið sameiginlegt með þeim vandalisma og skrílslátum sem einkenna Saving Iceland.

En ef einhver er til í að borga tugi eða hundruð þúsunda fyrir skemmtiatriði og leigu á tækjum fyrir samkomu á vegum náttúruverndarsinna, gæti ekki einhver verið til í að borga óhörðnuðum og áhrifagjörnum unglingum svipaða uphæð fyrir að ganga allnokkrum skrefum lengra, skemma, trufla, eyðileggja og leggja sjálfa sig í hættu?

[Guðsteinn Haukur Barkarson, 30.7.2007 kl. 15:17]

Ja hérna, ef þetta reynist rétt þá er vel hægt að nota orðið "atvinnumótmælendur" um þetta pakk! Eins og ég er ekki hrifinn af þeirri orðanoktun. Er það ekki Inga Vala mín?

[Ingvar Valgeirsson, 30.7.2007 kl. 15:37]

Kemur mér nú á óvart að þú munir ekki, Guðsteina mín, eftir þessu með Greenpeace-mótmælin. Þetta fór síst leynt á sínum tíma.

Svo er hægt a spyrja sig hverjir sjái sér hag í að veita fé til mótmælenda, hvort sem það er í formi beinna greiðslna til handa mótmælendum eða styrkja (t.d. með því að greiða fyrir veitingar eða leigu á hljóðkerfi á samkundur þeirra) - t.d. voru uppi ásakanir í Ameríku um að hvalveiðiandstæðingar þarlendir tækju við greiðslu frá einu veitingahúsi fyrir að fara að mótmæla fyrir framan annað í nágrenninu.

Tek fram að ég veit ekki rassgat um hvort þetta er tilfellið með Saving Iceland-vandræðaunglingana sem nú eru í fréttum. Hef bara gaman af að segja frá þessum sem ég hitti sl. sumar.

[Ingvar Valgeirsson, 30.7.2007 kl. 16:26]

Hvað hefur dýralæknirinn gert þér?

[Elvar Geir Sævarsson (IP-tala skráð) 30.7.2007 kl. 23:13]

Þeir sem virkja eru á launum við það.

[Guðsteinn Haukur Barkarson, 31.7.2007 kl. 14:55]

"Kemur mér nú á óvart að þú munir ekki, Guðsteina mín, eftir þessu með Greenpeace-mótmælin. Þetta fór síst leynt á sínum tíma."
Nei, það er ekki von að ég muni ekki eftir því. Ég bjó ekki á Íslandi þegar á þessu stóð.  ;) 

[Einar Hafberg (IP-tala skráð) 31.7.2007 kl. 15:52]

Sæll, rambaði inn á bloggið þitt þú átt það til að vera skemmtilegur. Þú ert að spyrja um Scott Bacula.